Mahboob Ahmad Shah (محبوب احمد شاہ)
پنجابی نعت
میرے سوھنے ربا تیرا یار بڑا سوھنا اے
جیہڑا توں بنایا شاہکار بڑا سوھنا اے
من لیا سوہنِیاں نیں جنتاں وی تیریاں
جتھے سوھنا وسے او دیار بڑا سوہنا اے
ماہِ کنعان نالوں قسمیں خدا دی
میرا سوھنا نبی لکھ وار بڑا سوہنا اے
اُنج تے زمانے وچ غاراں دا کوئی تھوڑ نیئیں
جنہوں حرا کہندے نیں او غار بڑا سوہنا اے
خوشی نال نچ کے براق سی ایہہ آخدا
سارے جگ نالوں ایہہ سوار بڑا سوہنا اے
اقصیٰ دے وچ میرے نبی دے دیدار لئی
نبیاں بنایا جو حصار بڑا سوہنا اے
خُلقِ عظیم رب اینویں تے نیئیں آکھیا
سوھنے دا قول تے قرار بڑا سوھنا اے
نبی پاک ویکھ کے صحابہ دا ایہہ آکھنا
ماں باپ تیرے تے نثار بڑا سوھنا اے
ہفتے دے دن سارے سوھنے نالے پیارے نیں
نسبت نال نبی دی سوموار بڑا سوھنا اے
رب دی سونہہ عقل گھٹاندا نیئیں ودھاندا اے
طیبہ دی فضاواں دا خمار بڑا سوھنا اے
طیبہ نامی بستی دی کراں کی تعریف میں
پھل دا کی دساں اُوتھے خار بڑا سوہنا اے
نبی دے پسینے دی مہک نال بھریا
روضے والا کوچہ تے بازار بڑا سوھنا اے
COMMENTS