ہتھ بنھ کے میں ترلے پانواں مینوں سد لو مدینے آقا

پنجابی نعت
ہتھ بنھ کے میں ترلے پانواں مینوں سد لو مدینے آقا
تیرے کرم دے صدقے جاواں مینوں سد لو مدینے آقا

حج کر کے حاجی چلے چلے او طیبہ ولے
اونہاں سانبھ سانبھ کے بنیاں سوھنے دیاں یاداں پلے
کئی عمراں پچھوں چلے کئی چلے پہلے ھلے
اینج لگدا اے دنیا ٹر گئی اساں رہ گئے کلم کلے
تیرے در تے عید مناواں مینوں سد لو مدینے آقا
تیرے کرم دے صدقے جاواں مینوں صد لو مدینے آقا

میری آس امید دے دیوے کرے بجھ نہ جاون آقا
میرے دل دے باغ دے پَھل پُھل کرے سک نہ جاون آقا
جیہڑے تیری دید دے طالب کرے سکھ نہ پاون آقا
ایہہ ساہ وی ادھارے میرے کرے مک نہ جاون آقا
ھن سن لو میری دعاواں مینوں سد لو مدینے آقا
تیرے کرم دے صدقے جاواں مینوں سد لو مدینے آقا

وچ ہجر دے لمیاں راتاں اکھیاں لاون برساتاں
جو گزرن تیرے در تے او راتاں سب شب راتاں
ھُن پل وی لگدا مینوں اک صدی برابر شاہا
مینوں ہجر نے مار مکانا دیو دید دیاں سوغاتاں
دن رات میں ہاڑے پاواں مینوں سد لو مدینے آقا
تیرے کرم دے صدقے جاواں مینوں سد لو مدینے آقا

COMMENTS

Subscribe
Notify of
guest

0 Comments
Inline Feedbacks
View all comments
0
Would love your thoughts, please comment.x
()
x