طیبہ والا جدوں دا دیار چھٹیا

پنجابی نعت
طیبہ والا جدوں دا دیار چھٹیا
دل دا اے چین تے قرار لُٹیا

سد لوو آقا مینوں فیر اک وار
آقا تیری رحمتاں دی حد نہ شمار
ہر ویلے روندا رہندا یاد اندر
سن لوو آقا دکھی دل دی پکار
ہجر وچھوڑے مینوں مار سٹیا
دل دا اے چین تے قرار لُٹیا

طیبہ ول جاندے پئے فیر قافلے
میرے لئی اوکھے لمے ہوئے فاصلے
دوڑ دوڑ راہواں اُتے میرے سوھنیا
تلیاں دے اُتے لکھاں پئے آبلے
دُکھاں دا اے میرے تے پہاڑ ٹٹیا
دل دا اے چین تے قرار لُٹیا

ساری رات ہنجواں دے دیوے بال بال
طیبہ دے بلاوے نوں اڈیکاں سارا سال
رُل گیاں راہواں وچ ککھاں وانگوں
تہاڈے کولوں لُکیا نیئیں آقا میرا حال
ٹریاں بتھیرا نیوں پینڈا مکیا
دل دا اے چین تے قرار لُٹیا