Maae Hubbe Nabi

Maae Hubbe Nabi Say Jis Ka Dil Sarshaar Ho Jaye
Woh Danaa E Haqeeqat Waaqif E Israar Ho Jaye.

Ziyaarat Rowza E Sarkaar Ki Ik Baar Ho Jaye
Phir Uss Ke Baad Chaahe Yeh Nazzar Be Kaar Ho Jaye.

Karam Unka Ager Apna Shareek E Kaar Ho Jaye
Talaatum Khaiz Toofaanon Se Bera Paar Ho Jaye.

Ager Be Pardah Husn E Sayyid E Ibraar Ho Jaye
Zameen Se Aasmaan Tak Aalam Anwaar Ho Jaye

Nazzar Aaye Jisse Husn E Shahe Kaunain Main Khaami
Ilaah Ul Aalameen Aisee Nazzar Be Kaar Ho Jaye

Ataa Farmaaiye Aankhon Ko Meri Aisee Beenaayee
Nazzer Jis Simt Uthhay Aap Ka Deedaar Ho Jaye

Ager Aks E Rukhe Sarkaar Ki Ho Jalwah Aaraaee
Mere Dil Ka Siyah Khaana Tajalli Zaar Ho Jaye

Sukoon Parwar Hain Lamhe Zikr E Aaqaa E Do Aalam Ke
Khudaaya Zindagi Waqf E Gham E Sarkaar Ho Jaye

Tumhaara Naam Lewa Hay Gadaa E Be Nawaa Tehseen
Karam Ki Ik Nazzar Uss Par Bhi Aay Sarkaar Ho Jaye.